مراجعة Samsung Galaxy S21 Ultra 5G

متوفر بالاسواق

samsung galaxy s21 ultra 5g
الشاشة : 6.8"
الكاميرا : 108MP
المعالج : Exynos 2100
الرامات : 12/16GB
الذاكرة : 128GB/256GB/512GB
البطارية : 5000mAh

مراجعة هاتف Samsung Galaxy S21 Ultra مع ابرز عيوب ومميزات

مواصفات و تصميم Samsung Galaxy S21 Ultra 5G
  • التصميم :
    الهاتف مصنوع من الزجاج مع اطار معدني من الالمونيم
  • الشاشة :
    بحجم 6.8 بوصة
  • معالج الهاتف :
    مُعالج جبار من نوع Exynos 2100
  • الذاكرة/الرام :
    ذاكرة داخلية بالاحجام التالية 128GB/256GB/512GB في اصدارات مُختلفة مع رامات بحجم 12/16GB
  • نظام التشغيل :
    اندرويد 11
  • كاميرات الجهاز :
    الكاميرا الخلفية 108 + 10 + 10 + 12 ميجا بكسل بفتحة عدسة f/1.8 للاولي و f/4.9 للثانية و f/2.4 للثالثة و f/2.2 للرابعة و الكاميرا الامامية 40 ميجا بكسل بفتحة عدسة f/2.2
  • بطارية الجهاز :
    5000 مللي امبير
  • الالوان المُتاحة :
    يتوفر الهاتف باللون الأسود وباللون الفضي
  • الدعم و الاتصال :
    يدعم 4G و 5G

كل عام وتقوم سامسونج بأخراج آخر التكنولوجيا التي وصلت عليها وكان لهاتف Samsung Galaxy S21 Ultra نصيب الاسد من هذه التقنيات فنحن الآن على موعد مع واحد من اقوى الهواتف الذكية لعام 2021 الهاتف الذي تفوق من وجهة نظرنا  في حارة الموبايلات على اقوى هواتف شركة آبل لنفس العام من حيث بعض التفاصيل وخصوصاً التصوير و الكاميرات على أسها طبعاً iPhone 12 و iPhone 12 Pro و iPhone 12 Pro Max وحتى باقي المُنافسين.

كاميرا وصور قوية للغاية

samsung galaxy s21 ultra 5g كاميرات

الكاميرات و كما ذكرنا من قبل اساسية بحجم 108 ميجا بيكسل و كاميرا وايد Wide Angle بدقة 12 ميجا بيكسل وتعمل ماكرو برده بالاضافة الي العدستين الخاصتين بالزوم 10 ميجا بيكسل واحده منهم 3X والتانية X10 حقيقي وبتوصل لـ100X عن طريق السوفت وير، بالطبع هناك Laser Autofocus والكاميرا السيلفي تأتي بحجم 40 ميجا بيكسل.

أداء الكاميرات ممتاز جدًا كعادة سامسونج في التصوير النهاري بالعدسة الرئيسية الا انه ليس هناك تطوير ملحوظ عن كاميرات Note 20 Ultra، أضف الي ذللك أداء البورتريه ضعيف نسبيًا نظراً لإن الموبايل لا يستخدم غير العدسة الرئيسية، العدسات الآخرى خاصة بالـZoom لات تستطيع ان تصور بها بوضع البورتريه بالاضافة الي ان الهاتف يقوم بعمل زوم بالعدسة الرئيسية من تلقاء فسه لتصوير بوضع البورتريه 3X.

وكعادة سامسونج فأن الاهتمام بتفاصيل الالوان كان واضحاً فألوان الهاتف تُشبع العين وتود بكل تأكيد رؤيتها والزاوية العريضه واسعة جدًا واكيد تفاصيلها اقل من الاساسية شوية، ولكن المُبهر اداء الزوم ، فالزوم حقيقي 3X يستطيع ان يُظهر لك تفاصيل محترمة جدًا .. وعدسة تانية بزوم حقيقي 10X برده من غير ما تخسر اي تفاصيل.

والمبهر اكتر ان العدسة بتوصل لـ100X زوم Digital نتائجه ممتازة جدًا وفعلًا فارقه عن الجيل القديم، وكمان الـZoom Lock بيساعدك في انك تاخد الصورة دون إهتزاز كبير فعلي الرغم من وجود بعض الاهتزازات لكنها ليست بنفس الموجود في الجيل السابق.

تصوير Night Mode عبقري

علشان تصور في إضاءة داخلية شغل الـNight Mode وصور .. هتتفاجىء الصور تفاصيلها بتزيد ازاي .. بس على حساب Sharpening زيادة شوية في الصورة .. الـNight Mode بقى ممتاز لاقصى درجة .. ده احسن نايت مود جربته من سامسونج لحد دلوقتي وممكن يتفوق على ابل كمان.

وكمان العدسات الـZoom تقدر تصور بيها Night وبتاخد تفاصيل محترمة جدًا على عكس العدسات الزوم القديمة اللي مكنتش بتاخد منها تفاصيل بليل.

كاميرا سيلفي افضل كثيراً

الكاميرا السيلفي تفاصيلها كتير جدًا .. بس العزل بتاعها بعافية شوية .. او شويتين تلاته .. كررت التجربة اكتر من مرة وكل مرة بلاقي البورترية مش مظبوط .. معرفش الـPortraits مالها في الموبايل ده مش ظابطه ليه ولا خلفية ولا امامية.

ولكن برده الـNight Mode في السيلفي اداءه قوي بدرجة بشعة .. عمومًا النايت مود في الموبايل ده سواء كاميرا خلفية او امامية قوي جدا جدا.

بالنسبة بقى لتصوير الفيديوهات فالموبايل ده بيقدر يصور فيديوهات 8K على 24 فريم .. مش أول مرة نشوفها، بيصور 4K مع 60 فريم او 30 فريم .. وبيصور 1080p برده مع 60 فريم او 30 فريم .. وتقدر تبدل بين العدسة الـ1X والعدسة الـ3X والعدسة الأساسية والعدسة الـUltra Wide في نفس الوقت وانت بتصور الفيديو.

وأخرك في الـZoom في الفيديوهات بتوصل لـ20X لكن الثبات بيقل جامد .. وبرده إستقبال الصوت من الميكروفون بيتغير حسب الـZoom اللي انت عامله .. وكمان في وضع الـDirector’s View او عدسة المُخرج يعني .. وضح بيصورلك او بيشغل لك الـ3 عدسات في الشاشة في نفس الوقت علشان تختار العدسة على حسب المشهد اللي انت عايز تصوره.

يعني بيظهر عندك العدسة السيلفي والعدسة الـUltra Wide والأساسية وعدسات الزوم .. هتشوف قدامك كل واحده منهم بتعرض ايه وانت تختار المشهد اللي انت محتاجه .. شوف فيديو المراجعة علشان تفهم أكتر.

شاشة كبيرة واداء مُتميز

samsung galaxy s21 ultra 5g شاشة

شاشة S21 Ultra عملاقة بحجم 6.8 بوصة فيها إنحناء بسيط من الأطراف مع ثقب متوسط الحجم للسيلفي والشاشة من نوع Dinamic AMOLED الجيل التاني بدقة QHD+ مع تردد بيوصل لـ120 هيرتز مع سطوع بيوصل لـ1500 شمعة.

شاشة خرافية .. ولا كلمة ممكن تتقال في حقها .. وكمان الشاشة بـContrast من 3 مليون الى 1 .. فـ أنت بتاخد هنا تجربة شاشة بدرجات ألوان خرافية وفي نفس الوقت مشبعة وفي نفس الوقت سطوع عالي جدًا وفي نفس الوقت فخمة وفيها كرفات بقت بسيطة جدًا جدًا صعب إنها تضايقك في الإستخدام.

كلنا عارفين إن سامسونج اصلًا مُميزة جدًا في الشاشات .. مكنش ناقصها غير نقطة واحدة وهي .. إن التردد العالي يشتغل مع الدقة العالية .. والموبايل ده بيقدر يعمل كده .. وبكدا سامسونج تبقى وصلت للـExtra أو أعلى Level في الشاشات .. واكيد طبعا الشاشة عليها حماية Gorilla Glass Victus وعليها سكرينة.

عمر البطارية

samsung galaxy s21 ultra 5g بطارية

تعتبر بطارية الهاتف على ورق عملاقة بحجم 5000 مللي أمبير، ووقت التجربة الفعلية للموبايل ومع تشغيل الـResolution الأعلى والتردد الأعلى اللي المفروض مُتغير .. بينزل لـ11 هيرتز وبيطلع لـ120 هيرتز على حسب المحتوى اللي بتتفرج عليه .. والبطارية في احسن احوالها ادتني 5 ساعات شاشة مفتوحة .. ومع الضغط والإستهلاك الشديد ادتني 3 ساعات شاشة مفتوحة.

اداء قوى وجبار

samsung galaxy s21 ultra 5g اداء

من التجربة الفعلية للهاتف فأداء المُعالج مع الحالي مع القديم أفضل بشكل ملحوظ في السخونية، الموبايل ده بيسخن أقل بفرق ملحوظ من Galaxy Note 20 Ultra وقت تجربتي ليه .. ولكن ده مش معناه ان S21 Ultra مش بيسخن .. لا هو بيسخن طبعًا بس بشكل معقول وسخونيته أقل من SD888 الموجود في Mi 11 .. معرفش مشكلته كانت المعالج ولا شاومي.

تاني حاجة الـDrop Frames .. هي قلت شوية والموبايل فعلًا تحسه بقى أنعم في الإستخدام الخفيف والمتوسط .. ولكن لما تضغط عليه ممكن تبدأ شوية نتشات خفيفة تظهر .. وقت تجربتي للـSD888 في شاومي Mi 11 كان أنعم من كده .. فا مازال الـ اكسينوس 2100 مقدرش يتفوق او حتى يكافيء الـSD888 في نقطة السلاسة والنعومة مع الإستخدام العنيف.

الكلام ده أنت ممكن متلاحظوش لو استخدامك مش عنيف .. او لو جاي من أي معالج قديم من سامسونج هتحس S21 Ultra انعم ده طبيعي .. بس انا بدوري بجرب وبقارن .. وأنا من رأيي، لا لسه مشكلة الـDrop Frames متحلتش ولسه بيحصل إختناق أحيانًا في أداء المعالج مع الضغط الشديد عليه.

وتفسيري المتواضع للـDrop Frames اللي بيعملها المعالج ده إنه أول ما بيحس إنه هيعدي درجة حرارة معينة .. السوفت وير اوتوماتيك بيقلل ترددات المعالج علشان درجة الحرارة متعلاش أكتر .. وده بالتبعية إتترجم للنقطة اللي قلتهالك من شوية وهي ان السخونية بقت أقل .. ومُجملًا لو بتقارن مع سلسلة ايفون 12 .. فـ لسه معالج ابل أقوى.

وبالنسبة للأداء الرسومي فا لعبة ببجي بتشتغل على Ultra HDR ومفيش اعدادات جرافيك أعلى من كده حاليًا .. كول اوف ديوتي بتشتغل على Very High وفريمات Max والتجربة محترمة جدًا في الألعاب ومفيش Drop Frames بتحصل كتير.